ባለፈው አመት በፓሪስ በተካሄደው የኦሎምፒክ ውድድር አልጄሪያዊቷ አትሌት ኢማን ካሊፍ ከፆታ ተገቢነት አንፃር በርካታ ጥያቄዎች ሲነሱባት እንደነበር የሚታወስ ነው:: 

ከዚህ በመቀጠልም በሌሎች ውድድሮች ለመሳተፍ ግዴታ ምርመራ ማድረግ እንዳለባት የሚገልፁ ደንቦች ወጥተዋል:: 

የአለም አትሌቲክስ ማህበር በቅርቡ ባወጣው መግለጫ መሰረትም አትሌቶች ለአንድ ጊዜ ብቻ የሚደረግ የፆታ ምርመራ ማከናወን ይጠበቅባቸዋል:: 

ይህ ምርመራ የወንዱ Y ክሮሞዞም ላይ የሚገኘውን SRY ዘረ መል ወይንም በተለምዶ ‘ፆታ የሚለይ ዘረ መል ‘ የተባለውን መርምሮ ማወቅ የሚያስችል ነው::ምርመራው ከጉንጭ የውስጠኛው ክፍል በሚወሰድ ናሙና ወይንም በደም ምርመራ የሚካሄድ ይሆናል፡፡

የአለም አትሌቲክስ ፕሬዝዳንት ሰባስቲያን ኮ “ የሴቶችን ስፖርት በጥንቃቄ መያዝ እና ትክክለኛነቱን መጠበቅ ያስፈልጋል” በማለት ተናግረዋል:: “በርካታ ሴቶች እንዲወዳደሩ ስለምንፈልግ ትክክለኛ አሰራሮችን መከተል አለብን” በማለትም ገልፀዋል:: 

“ የY ክሮሞዞምን ብቻ መመልከት በራሱ አንድ ሰው ሴት ወይንም ወንድ ለመሆኑ በቂ ማረጋገጫ ነው ማለት አይደለም” በማለት በማንችስተር ሜትሮፖሊታን ዩኒቨርስቲ የስፖርት ፕሮፌሰር የሆኑት አሉን ዊልያምስ ለቢቢሲ በሰጡት መግለጫ ይናገራሉ:: 

እንደባለሙያው ገለፃ ጥሩ ጠቋሚ ቢሆንም ሙሉ በሙሉ ግን አጥጋባቢ መልስ የሚሰጥ ነው ማለት አይቻልም:: 

ከፆታ አፈጣጠር ጋር ተያይዞ ህመም ያለባቸው ሰዎች ያላቸው Y ክሮሞዞም በበቂ ሁኔታ የዳበረ አይደለም:: የተወሰኑ የተሰወሩ የዘረ መል አካላት ሊኖሩ ይችላሉ:: 

SRY ዘረ መልን ማወቅ ግን ከY ክሮሞዞም በተሻለ ጥሩ ምልክቶችን ይሰጣል:: 

ተጨማሪ የቴስቴስትሮን ንጥረ ነገር መያዝ ከሚሰጣቸው ጥቅሞች መካከል ተለቅ ያለ የጡንቻ ግዝፈት : የጠነከሩ እና የረዘሙ አጥንቶች እንደዚሁም እንደሳንባ እና ልብ ያሉ የሰውነት አካላት መጨመርም ይካታቱበታል:: እነዚህ የተለዩ ጥቅሞች ያላቸው አትሌቶች በሴቶች ስፖርት በመግባት ውድድሩን የአንድ ወገን ብቻ እንዳያደርጉት እየሰራሁ ነው በማለት የአለም አትሌቲክስ ገልፆል::